Loading...
कुलमानको कमाल : एक वर्षमै प्राधिकरणको आम्दानी १५ अर्ब रुपैयाँ बढ्यो

Click to Load Image

काठमाडौं–नेपाल विद्युत प्राधिकरणले व्यवस्थापकीय सुधार गरेपछि एक वर्षमै आम्दानी १५ अर्ब रुपैयाँ बढाएर ५० अर्ब २२ लाख ९४ हजार रुपैयाँ पुर्याएको छ । 
प्राधिकरणको कार्यकारी निर्देशकमा कुलमान घिसिङ नियुक्त भएसँगै व्यवस्थापकीय प्रद्धतीमा ब्यापक सुधार गर्दै प्राधिकरणले आम्दानी मात्र बढाएको छैन मुनाफा समेत कमाएको छ । 
प्राधिकरणले गत आर्थिक बर्षमा यो आम्दानी गरेको हो । प्राधिकरणको ३२ औं बार्षिक उत्सवको अवसरमा बिहीबार कार्यकारी निर्देशक घिसिङले प्रतिवेदन पेश गर्दै अघिल्लो आवको तुलनामा आम्दानी १५ अर्ब रुपैयाँले बढेको बताए । उनका अनुसार प्राधिकरणले गत आव ०७३/०७४ मा २ अर्ब ४० करोड ७३ लाख रुपैयाँ सञ्चालन मुनाफा समेत आर्जन गरेको छ । अघिल्लो आवमा प्राधिकरण ३ अर्ब ६ करोड रुपैयाँ सञ्चालन नोक्सानीमा रहेको थियो । 
प्राधिकरणले १५ बर्षपछि सञ्चालन नाफा कमाएको हो । विद्युत चुहावट नियन्त्रण  व्यवस्थापनका कारण सञ्चालन नाफा भएको जनाइएको छ । यस्तै, प्राधिकरणको खुद नोक्सानी घटेर ९७ करोड ८९ लाख रुपैयाँमा आएको छ । अघिल्लो आवमा यस्तो नोक्सानी ८ अर्ब ८९ करोड रुपैयाँ रहेको जनाइएको छ । 
प्राधिकणले एक बर्षमा चुहावट नियन्त्रण, विद्याुत आयातमा औसतदरमा कमी, महसुल समायोजन, नियमित विद्युत आपुर्ती तथा विद्युत गृहहरुको मर्मत तथा सुधारका कारण नोक्सानी कम हुँदै गएको हो । सोही काण करिव ४३ प्रतिशतले आम्दानी बढेको प्राधिकणले जनाएको छ । 
प्राधिकरणको सो बार्षिक उत्सवमा दिइएको जानकारी अनुसार खर्च ३६ अर्ब ८ करोड रुपैयाँवाट बढेर ४५ अर्ब ५७ करोड रुपैयाँ पुगेको छ । घिसिङका अनुसार प्राधिकरणका ग्राहक संख्या २९ लाख ७० हजारवाट वढेर ३२ लाख ६० हजार पुगेका छन् । यस्तै, २५.७८ प्रतिशत रहेको चुहावट घटेर २२.९ प्रतिशतमा झरेको उनले बताए । 
यस्तै, गत आवमा ६ हजार २ सय ५७ गिगावाट आवर विजुली प्राप्त भएको प्राधिकरणले जनाएको छ । यो अघिल्लो बर्षको तुलनामा २३ प्रतिशत वढी हो ।
घिसिङले गत तिहारपछि नियमित विद्युत आपुर्तीमा सफलता पाउनु, चुहावट नियन्त्रण, विद्युत गृहहरुको मर्मत सुधारले सञ्चालन मुनाफा आर्जन गरेको बताए । तर, अघिल्लो बर्षको घाटाकै कारण खुद नाफा भने कमाउन नसकेको उनको भनाइ छ । आउँदो बर्ष भने प्राधिकरणले खुद नाफा आर्जन गर्ने घिसिङले बताए ।
ठूला क्षमताका प्रसारण लाइन बन्दैछन् 
वार्षिकोत्सवको अवसरमा कार्यकारी निर्देशक कुलमान घिसिङले दिनुभएको जानकारीअनुसार प्राधिकरणले उत्तर दक्षिण नदी बेसिनका आधारमा ४०० केभी क्षमताका प्रसारण लाइन निर्माण अगाडि बढाइने भएको छ । यस्तै पूर्व–पश्चिम ४०० केभी क्षमताका प्रसारण लाइन निर्माणलाई पनि उच्च प्राथमिकतामा राखिएको छ । 
विश्व बैंक, एशियाली विकास बैंक, युरोपेली बैंक, मिलिनियम च्यालेन्ज कर्पोरेशन अमेरिकाको सहयोगमा पूर्वदेखि पश्चिमसम्म उच्च क्षमताका प्रसारण लाइन निर्माणको योजना अगाडि सारिएको छ । 
त्यस्तै न्यू बुटवल–गोरखपुर र गल्छी–केरुङ अन्तरदेशीय ४०० केभी क्षमताको प्रसारण लाइन आगामी पाँच वर्षभित्र निर्माण सम्पन्न गर्ने योजना अगाडि सारिएको छ । यी अन्तरदेशीय प्रसारण लाइन विद्युत् आयात निर्यात, इनर्जी बैंकिङ तथा पावर ह्विलिङसमेतका लागि महत्वपूर्ण औजारका रुपमा रहेको घिसिङको भनाइ छ । 
समस्यामा रहेका आयोजना सम्पन्न गरिने 
प्राधिकरणले आफू र आफ्ना सहायक कम्पनीमार्फत अगाडि बढाएका आयोजना तोकिएको समयमा नै सम्पन्न गर्न हदैसम्मको प्रयास गर्ने प्रतिबद्धता जनाएको छ । कुलेखानी तेस्रो १४ मेगावाट, चमेलिया ३० मेगावाट, माथिल्लो त्रिशूली थ्री ‘ए’ ६० मेगावाट आयोजनालाई तोकिएको समयमा निर्माण सम्पन्न गराउन हदैसम्मको प्रयास गर्ने र नयाँ आयोजना निर्माणमा ध्यान दिने प्राधिकरणले जनाएको छ । 
यस्तै चिलिमे जलविद्युत् कम्पनीले निर्माण गरिरहेका २२५ मेगावाट क्षमताका आयोजना निर्माण सम्पन्न गर्ने र आगामी असारसम्म ४५६ मेगावाट क्षमताको माथिल्लो तामाकोशी जलविद्युत् आयोजना सम्पन्न गर्नेतर्फ पहल गरिने कार्यकारी निर्देशक घिसिङले जानकारी दिए । 

0 comments

Write Down Your Responses

Loading...
Amrit Baskune

ads