Loading...
पार्टीमा फर्कदा मन्त्रालयको जिम्मेवारी

काठमाडाै ।  पार्टी छाडेर केही समय अन्यत्रै लागी फेरि फर्केका माओवादी केन्द्रका रामबहादुर थापा र मातृका यादव मन्त्री हुन सफल भएका छन् ।
आजको नागरिक दैनिकमा खबर छ- केपी ओली नेतृत्वको सरकारमा माओवादी केन्द्रले पठाएका थापा र यादव कुनै समय पुष्पकमल दाहाल नेतृत्वको मूल पार्टीबाट अलग भएका थिए । मूल पार्टीमा फर्केको केही समयमै थापाले गृह र यादवले उद्योग मन्त्रालयको जिम्मेवारी पाएका छन्।
शीतलनिवासस्थित राष्ट्रपति भवनमा विशेष समारोहका बीच राष्ट्रपति विद्या भण्डारीले थापा र यादवलाई विभागीय मन्त्रीको रुपमा सपथ खुवाइसकेकी छन् । दुवैले आआफ्नो मन्त्रालयमा पुगेर कार्यभार पनि समालिसकेका छन् । मूलधारमै ररिहेका वर्षमान पुन, जनार्दन शर्मा, गिरिराजमणि पोखरेल, अमनलाल मोदी, बिना मगर र पम्फा भुसाल सम्भावित मन्त्रीका रुपमा चर्चामा थिए । तर, उनीहरुलाई थापा र यादवले उछिने।
थापा र यादव यसअघि मन्त्री हुँदा एकएकवटा चर्चित प्रकरणसँग जोडिएका थिए । थापालाई ‘कट्वाल प्रकरण’ तथा यादवलाई ‘शौचालय प्रकरण’ सँग जोडेर हेरिन्छ । ‘कट्वाल प्रकरण’ का कारण तत्कालीन प्रधानमन्त्री दाहालले राजीनामासमेत दिनुपरेको थियो । तत्कालीन रक्षामन्त्री थापा सो प्रकरणको सूत्रधार मानिएका थिए।
थापा तत्कालीन उपाध्यक्ष मोहन वैद्यसँगै २०६९ असार ६ गते माओवादीबाट अलग भएका थिए । वैद्य माओवादीको महासचिव भएर काम गरेका थापा २०७३ वैशाख ६ गते दाहाल नेतृत्वको माओवादीमा फर्केका थिए । थापाले एमाले र माओवादीको गठबन्धन निर्माण भूमिका निर्वाह गरेका थिए । उनी एमालेसँग एकीकरणप्रति सुरुदेखि सकारात्मक रहँदै आएका छन् ।
पार्टी एकीकरणप्रति नकारात्मक देखिएका वर्षमान पुन पनि गृहमन्त्री हुन इच्छुक थिए। नवनियुक्त गृहमन्त्री थापाले ‘जनअपेक्षाअनुसार काम गर्ने, गृह प्रशासन सुधार गर्ने र प्रभावकारी बनाउने’ प्रतिबद्धता  जनाएका छन । शान्तिप्रक्रियाका बाँकी कार्यभार पूरा गराउन आफ्नो कार्यकाल महत्वपूर्ण हुने उनको अभिव्यक्तिलाई भने अर्थपूर्ण रुपमा हेरिएको छ । उनी राष्ट्रियसभा सदस्य हुन् ।
नवनियुक्त उद्योगमन्त्री यादव तत्कालीन एमाओवादी पार्टीबाट सबैभन्दा पहिला बाहिरिने नेता हुन् । दाहाल नेतृत्वको सरकारमा वनमन्त्री हुँदा एक अधिकृतलाई शौचालयमा थुनेपछि उनी ‘बर्खास्ती’ मा परे। त्यसपछि एमाओवादी छाडेर नेकपा माओवादी पुनर्गठन गरेको घोषणा गर्दै उनी त्यसको संयोजकसमेत बने ।

0 comments

Write Down Your Responses

Loading...
Amrit Baskune

ads