बार्सिलोनाको सानदार जित

43 Views

एन्टोइन ग्रीजम्यानले दुई गोल गरेपछि स्पेनिस ला लिगामा बार्सिलोनाले रियल बेटिसमाथि सानदार जित निकालेको छ । घरेलु मैदानमा आइतबार राति भएको खेलमा बार्सिलोनाले रियल बेटिसलाई ५–२ गोलले हरायो ।

कप्तान लियोनल मेस्सी र लुइस स्वाारेजको अभावलाई एन्टोइन ग्रीजम्यानले टारेका थिए । साविक विजेता बार्सिलोनाको लिगमा यो पहिलो जित हो । जारी सिजनको उद्घाटन खेलमा एथ्लेटिक बिल्बाओसँग १–० गोलले पराजित भएपछि बार्सिलोना केही दबाबमा देखिएको थियो ।

कप्तान मेस्सीको पीडुलाको मांसपेशीमा चोट लाग्नु र स्वारेज पनि घाइते हुँदा बार्सिलोनाको अग्रपंक्तिमा ग्रीजम्यानले सम्हालेका हुन् । बार्सिलोनाको जितमा ग्रीजम्यानसँगै कार्लेस पेरेज, जोर्डी अल्वा र आर्टुरो भिडालले एक एक गोल गरे । रियल बेटिसका नविल फेकिर र लोरेन मोरनले एक एक गोल गरे ।

खेलमा सुरुवाती अग्रता रियल बेटिसले लिएको थियो । १५औं मिनेटमा नविल फेकिरले गोल गर्दै टोलीको उत्साह बढाए । त्यसपछि ग्रीजम्यानले ४१औं मिनेटमा बराबरी गोल फर्काए । ग्रीजम्यानले ५०औं मिनेटमा ब्यक्तिगत दोस्रो गोल गर्दै बार्सिलोनालाई अग्रता दिलाए । ५६औं मिनेटमा कार्लेस पेरेज र ६०औं मिनेटमा अल्वाले गोल गरेपछि बार्सिलोनाले थप बलियो बन्यो ।

७७औं मिनेटमा भिडालले गोल गर्दै बार्सिलोनाको जित सुनिश्चित गरेका थिए । ७९औं मिनेटमा रियल बेटिसका लोरेन मोरनले अर्को गोल फर्काए पनि टोलीले हार टार्न सकेन । जितसँगै दुई खेलबाट तीन अंक बनाएको बार्सिलोना नवौं स्थानमा उक्लिएको छ । रियल बेटिसले खाता खोल्न सकेको छैन ।

यसैगरी आईतबार रातिनै भएको अन्य खेलमा एट्लेटिको म्याड्रिडले लेगानेसलाई १–० गोलले हराएको छ । एट्लेटिकोको जितमा भिटोलोले ७१औं मिनेटमा निर्णायक गोल गरेका थिए । जितसँगै दुई खेलबाट ६ अंक बनाएको एट्लेटिकोले दोस्रो स्थानमा छ । लेखानेस अंकविहीन छ । अर्को खेलमा रियल सोसियडाले मालोर्कालाई १–० गोलले हरायो ।

सोसिइडाडका रईलोले ७८औं मिनेटमा निर्णायक गोल गरे । स्पान्योल र डिर्पोटिभो अलाभेसले गोलरहित बराबरी खेल्दै अंक बाँडेका छन् ।

सोमवार, भदौ ९, २०७६ मा प्रकाशित

सम्बन्धित सामाग्री



sidebar ad
Loading...