घुस संवादले देखाएको न्यायालयको कुरुप तस्वीर

तत्कालका लागि दुईजना मात्रै छानबिनमा तानिएको अडियो प्रकरणले कल्पनै गर्न नसकिने विकृतिलाई सतहमा ल्याएर न्यायपालिकाभित्र सुधारको मागलाई थप औचित्यपूर्ण बनाएको छ ।

  • ‘प्रधानन्यायाधीशबाट १ नम्बरलाई खबर गर्न लगाइदिन्छु । हजुरलाई पनि खबर गर्न लगाइदिन्छु । तपाईँ डराउनु पर्दैन । किन डराएको ? यस्तो मौका कहिले आउँछ ? अरु मान्छे कत्रो गरेर बसेका छन् ।’
  • ‘माथि मैले मनाएर तपाईँलाई संकेत आएन भने नगरिस्यो । माथिबाट म गराउँछु । सामान पनि म लिन्छु । अलि राम्रै ढंगले लिऊँ । यो अवसर सधैं आउँदैन, हेरिस्यो है ।’
  • ‘यिनीहरुका सबै च्यानल हावा खाए । खासमा दरिलोसँग यिनीहरु जानै सकेनन् । माथिबाट उ पनि भएर आउँछ । तपाईँको आदेश सदर भएर ल्याउनेसम्मको जिम्मा मेरो भयो । तपाईं किन आत्तिएको ?’

यी सबै कुरा अधिवक्ता रुद्र पोखरेलले जिल्ला अदालत, काठमाडौंका न्यायाधीश राजकुमार कोइरालालाई टेलिफोनमा भनेका हुन् । नेपाल बार एसोसिएसनका पूर्व कोषाध्यक्ष समेत रहेका अधिवक्ता रुद्र पोखरेलले सिभिल सहकारीका सञ्चालक इच्छाराज तामाङलाई धरौटीमा छुटाउन चाहन्थे । तामाङ सिभिल सहकारीमार्फत सर्वसाधारणको रकम ठगी गरेको आरोपमा पक्राउ परेका थिए । पोखरेलले गत पुस (२०७८) मा न्यायाधीश कोइरालालाई घुसको प्रस्तावमात्रै गरेनन्, आफूले भनेअनुसार आदेश भएमा उच्च अदालतबाट सदर गराउने र ‘माथि’बाट केही नहुने आश्वासन दिए ।

सुरुमा अधिवक्ता पोखरेलसँग कुराकानी गर्न आनाकानी गरेका न्यायाधीश माथिबाट संरक्षण हुने, आफ्नो आदेश उच्च अदालतबाट सदर पनि हुने र आफू कार्यरत अदालतमा कुनै अप्ठ्यारो समेत नहुने आश्वासन पाएपछि खुल्दै गए ।

सम्वादका क्रममा बारम्बार प्रधानन्यायाधीशसँग पनि कुरा गर्ने बताएका अधिवक्ता पोखरेलले आफूहरुलाई प्राप्त हुने रकम २ (करोड ?) को संकेत गरेपछि न्यायाधीश कोइरालाले कति धरौटी मागौं भनेर उनलाई सोधेका छन् ।

करिब ११ मिनेटको यो अडियो सम्वादले नेपालको सिंगो न्याय व्यवस्थाको कुरुप तस्वीर बाहिर ल्याइदिएको छ । अदालतमा घुस लेनदेन हुने गरेको चर्चा सार्वजनिक रुपमा हुँदै आएको थियो । पछिल्लो पटक नेपाल बार एशोसिएसनले प्रधानन्यायाधीश चोलेन्द्रशमशेर जबरामाथि विचौलियामार्फत घुस लिएको आरोप समेत लगाएको थियो ।

बिहिबार, असार ९, २०७९ मा प्रकाशित

सम्बन्धित सामाग्री




sidebar ad
Loading...