गएराती परेको अविरल वर्षासँगै नदी कटानले म्याग्दीको बेनी नगरपालिका ३ भकिम्लीको दुधेखोलामा एक घर पूर्ण रुपमा क्षति भएको छ । दुधेखोलाको कटानमा परेर स्थानीय दिपा पुनको घर पूर्ण रुपमा क्षति भएको जिल्ला प्रहरी कार्यालय म्याग्दीले जनाएको छ ।
पुनको ब्लकले गाह्रो लगाएको र टिनको छाना भएको ६ कोठामध्ये २ वटा कोठा नदीले कटान गरेर बगाएको छ । यसैगरी नदी कटानले घरको अन्य कोठाहरु पनि चर्किएर पूर्ण क्षति भएको छ भने शौचालय समेत बगाएको जिल्ला प्रहरी कार्यालय म्याग्दीका प्रहरी निरीक्षक नवराज केसीले बताए । नदी कटानबाट विस्थापित दिपाको परिवारलाई अहिले आफन्तको सारेर बस्ने व्यवस्थापन मिलाइएको छ ।
यसैगरी दुधेखोलाकै नारायण पुनको ढुङ्गामाटोले बनेको कच्ची घर र डिल्लीराम थापाको घर पनि नदी कटानको उच्च जोखिममा परेको छ । नदी कटानकै कारण नारायण पुनको गोठमा बाँधेको दुहुनो भैंसी खोलामा आएको बाढीमा परेर मरेको छ भने उनको गोठमा समेत क्षति पुगेको छ । दुधेखोलाको बाढीले एक घर पूर्ण क्षति, दुईवटा घर उच्च जोखिम र अन्य घरहरु जोखिममा परेको भकिम्लीका वडा सदस्य गेमबहादुर घर्तीमगरले जानकारी दिए । खोलामा आएको नदी कटानले मानवीय क्षति भने भएको छैन ।
दुधेखोलामा आएको बाढीका कारण म्याग्दीखोलालाई धकेलेर तलाउ समेत बनेको छ भने नदी कटानले बेनी–बराङ्जा जोड्ने ग्रामीण सडक अवरुद्ध भएको छ । सडक अवरुद्ध भएपछि भकिम्ली, बास्कुना, थामडाँडा र बराङ्जाका कृषकलाई सदरमुकाम बेनीसम्म दुध र तरकारीजन्य कृषि उत्पादन ढुवानी गर्न समस्या भएको छ । नदी कटानले क्षति पु¥याएको क्षेत्रको स्थलगत अवलोकनपछि जिल्ला समन्वय समिति म्याग्दीका प्रमुख देवेन्द्रबहादुर केसीले दुई ढङ्गले हेर्नुपर्ने बताए । उनले दुधेखोलामा ग्याबिन जाली लगाएर तत्काल मानववस्ती संरक्षण गर्नुपर्ने बताउँदै नगरपालिका, प्रदेश तथा केन्द्रीय सरकारले नदी कटान नियन्त्रणमा आवश्यक पहल गर्नुपर्ने बताएका छन् ।
वर्षाकै कारण पश्चिम म्याग्दी हुँदै जलजला–ढोरपाटन भएर रुकुम जोड्ने बेनी–दरबाङ सडकखण्डको घुमाउनेभीरमा पहिरो खसेर सडक अवरुद्ध बनेको छ । त्यस्तै हिमालपारीको जिल्ला मुस्ताङलाई जोड्ने बेनी–जोमसोम सडकखण्डको राहुघाटमा पहिरो खसेर सडक अवरुद्ध भएको छ भने बेगखोलामा खोलाको बहाव बढेर आवतजावतमा सास्ती भएको छ । बेनी–बागलुङ सडकखण्डअन्तर्गत रत्नेचौरको रानीवनमा पनि पहिरोले सडक अवरुद्ध बनाएको छ ।
यसैबीच नदी कटानबाट विस्थापित र उच्च जोखिममा परेका पीडित परिवारलाई जिल्लास्थित राजनीतिक दल तथा तिनका भातृ सङ्गठनले राहतस्वरुप नगद एवं जिन्सी सामान सहयोग गरेका छन् ।
नेकपा एमाले म्याग्दीले विस्थापित दिपा पुनलाई नगद पाँचहजार तथा नारायण पुन, डिल्लीराम थापा, खड्कबहादुर रोकामगर, लिलाबहादुर घर्तीमगर, भूपाल घर्तीमगर र दुर्गा थापालाई तीन हजार रुपैयाँका दरले राहत दिएको छ ।
त्यस्तै नेपाली कांग्रेसको युवा सङ्गठन तरुण दलको केन्द्रीय पार्षद शोभन श्रेष्ठको नेतृत्वमा पीडितलाई पाँचहजार बराबरको खाद्यान्न र १९ हजार एकसय रुपैयाँ नगद सहयोग गरेको जनाएको छ ।
